Beranda > KULINER > Masakan Betawi dari Niga Ari Ampe Ngejot

Masakan Betawi dari Niga Ari Ampe Ngejot

Orang Betawi punye rupe-rupe jenis, ciri khas, dan patut (tradisi) memasak masakan. Dari rupe-rupe jenis makanannye dapet bedain bakal keriaan (upacare khusus) dan bakal sari-sari. Artinye ade jenis makanan nyang cuman disuguin dalem keriaan khusus serente kaga bakalan didapetin di ari biase apelagi dijual di warung. Mengka itu banyak orang melongo ama roman makanan kaya gitu.

Kalo ada keriaan biasenye dibikin atu makanan nyang disajiin jadi pengetean (konsumsi) nyang dapet dikenalin ame orang nyang kaga ngikut keriaan. Waktu selametan kematian, misalnye, tuan rume sengaje nyuguin makanan khas. Untuk ngormatin orang mati, ade upacare: turun tane, tunggu kubur, tige ari, nuju ari, lime belas ari, empat pulu ari, seratus ari, ama haul.

Upacare nguburin orang mati disebut turun tane. Orang perempuan Betawi dilarang ngikut nguburin. Mereka sibuk di rume nyiapin pengetean (konsumsi). Pengetean nyang disiapin di ari turun tane adalah nasi begane. Seudenye orang-orang nyang ikut nguburin pulang, disediain konsumsi nasi begane. Nasi begane masing jadi konsumsi utame abis tahlilan malem arinye.

Tahlilan diadain saban malem. Ade nyang cuman tige ari, malaan ade nyang ampe 40 ari. Tahlilan dihadirin ame tetangge dan dipimpim mualim setempat. Umumnye tahlilan dimulain abis sembahyang Isya. Pade malem tertentu, kaya malem ke tige (nige ari), malem ke tujuh (nuju ari), malem ke-15, malem ke-40, malem ke-100, dan 1000 (haul) keluarge si mayit gundang tetangge lebih banyak dan ngundang tukang tesuir untuk memberi nasehat keagamaan. Pade malem-malem itu disediain pengetean khusus. Nige ari disediain dadar gule. Nuju ari disediain nasi biase lengkep. Malem lime belas disediain ketupat sayur. Malem empat puluh disuguin ketupat sayur laksa dan sate lembut. Waktu haul (1000 hari) biasanye orang nyang ade punya atawa orang kaya nyediain nasi kebuli dan pacri. Pacri masakan nyang bahan poko’nye terong, nanas, dan daging giling.

Pas jamaah tahlilan pulang dibagiin nasi berkat. Nasi berkat sebenernye sama aje ama nasi rames. Tapi nasi berkat Betawi lebih lengkep lantaran isinye nasi putih, semur daging, ikan pesmol, perkedel, acar kuning, emping, buah. Zaman dulu waktu pohon jati masing pade tumbuh, daon jati nyang lebar-lebar dan belon ketuaan dijadiin bungkusan nasi berkat. Seudenye daon jati kaga ade, dipake daon pisang batu. Malaan sekarang nasi berkat dimasukin ke dalem dus karton, diperencok-perencokin atawan dibuntel ama plastik.

Nasi kuning (lengkep) juge jadi salah satu sajian upacare. Nasi kuning Betawi dibikin dari beras ketan. Ia kaga dibikin kaya tumpeng tapi disajiin di tampah atawa piring. Ia jadi andelan upacare nuju bulan, akéké, sunatan, tamatan Qur’an, dan akad nikah.

Pade upacare pernikahan jenis makanannye lebih banyak lagi. Dikenal masakan jotan. Masakan jotan ‘ntu makanan nyang dibawain oleh calon besan perempuan ke rume calon besan laki-laki seari sebelom ari akad nikah. Upacare nganter makanan jotan disebutnye ngejot. Makanan jotan terdiri atas nasi putih, ikan talang-talang pesmol sepasang, semur bulat (1½ kg) sepasang, bekakak ayam sepasang, sambel kol sepasang (atawa acar kuning), sambel penganten (sambel kentang), sop dua peles, dan emping. Makanan jotan ini bakal dibagiin kepade famili dan tetangga calon besan laki-laki sekaligus ngingetin kepade supaye mao nganterin rombongan ngerudat (calon penganten laki-laki berangkat menuju rume calon penganten perempuan).

Masakan/makanan dalem masyarakat Betawi tkaga dibedain kaya-miskin. Ape nyang dimakan orang kaya dimakan juge ama orang biasa asal ia mampu belinye. Makanan orang biasa dimakan juge ama orang paling kaya. Cuman bedanye keliatan pade care nyajiin dan kebagusan bahan-bahannye. Misalnye, orang biase kaga saban sari makan sayur tangkar, tapi orang kaya kapan aje bise, sebab die punye duit.

Ampe sekarang belon ade nyang neliti sisik-melik masakan masyarakat Betawi. Pegimane sejarahnye, darimane asal-muasalnye atawa siape nyang paling mempengaruhi rasa, kesedepan, dan keenakannye. Kita cuman bise membade-bade (menduga-duga) kalo patut (tradisi) memasak dan rupe-rupe makanan orang bule, orang sipit (Cina), dan orang Arab/India kasi sumbangan significan bagi makanan Betawi. Ape bener?

Kategori:KULINER
  1. Belum ada komentar.
  1. No trackbacks yet.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: