Beranda > RUPA-RUPA > MUSRENBANG PROVINSI UNTUK APA ?

MUSRENBANG PROVINSI UNTUK APA ?

Jakarta,27 April 2011,
Gak tau kenape saye nyang tadinye ogah maen ke DPRD,tapi kerne ade temen minta ketemu, akhirnye kesono juga. Ba’da Lohor sampe sane dan ngupi bentaran depan DPRD,eeh… ada temen laen dateng nyamperin dan bilang “Lho kok abang gak ikut… Musrenbang?”. Enteng saye jawab “Ga diundang”. Temen tadi kaget dan bilang “Masa sich, pan taon kemaren abang ikut. Waduh, gak beres tuh nyang atur undangan” imbuhnya. Saye gak perduli. Namenye juga gak diundang, masa sich ngotot.

Temen tadi pegi begitu aje sambil ngedumel “Gak ngerti saye, tuh orang-orang LSM ame temen laen nyang gak juntrungan malah pade dateng”.
Pinjem istilah Fauzi Bowo, saya bilang ke temen saye “Emang Gue Pikirin”. Saye terusin ngupi sambil abisin sebatang rokok. Akhirnye, temen nyang janjian tadi pagi, dateng juga dan kite pinde ke warung kopi di Jalan Jaksa.

“Ngomong-ngomong, katenye ade MUSRENBANG Provinsi, taon kemaren abang ikut, ape ari ini abang dari sono?” kate temen saye buka obrolan. Saya ngegelengin kepala aje. Koq bisa sih ? temen saye heran. Katenye lagi “saye tau tuh rombongan LSM nyang deket ame pejabat-pejabat pade ikut MUSRENBANG. Padahal gak semue tau persoalan dan bisa urun rembug rapiin program-program” Saye diem aje ngedengerin temen bicare. Sambil nenggak kupinye temen saya terusin omongannye “ Lha, ntu urusan budaye, siape nyang tau, siape nyang bisa utak-atik dan kelarin atawa ngumplitin programnye”. Saya masi aje diem ngedengerin.

Kalu sual budaye, saye inget temen saye laennye. Die bilang urusan Budaye Betawi cuman ade dalem konsep. Biar kate tuh Undang-Undang Nomer 29 taon 2007 nyang jelas-jelas di Pasal 26 ayat 6,perentain Pemerentah Provinsi DKI Jakarta buat lestariin dan ngembangin, tetep aje budaye Betawi cuman dalem proyek doang. Bahkan die bilang, susah deh, kerne mafia proyek budaya Betawi di Denes susah dibongkar.

Temen saye rupanye dongkol setenge mati. Katenye “bayangin bang. Ntu orang-orang,LSM ame aktivis laen nyang bukan orang Betawi pade ikut ngebahas program budaye Betawi. Sementare abang ame pegiat budaye dan kesenian Betawi kagak ditoleh sama sekali”

Sambil narik napas die nerusin lagi “Kudunye BAPPEDA tuh ngerti dong, kudu ngajak orang yang tepat bukan asal goblek aje”. Saye senyam-senyum aje ngedengerin temen saye anak Betawi nyang bukan pegiat budaye Betawi tapi sangat perduli ame kebudayaan Betawi. Dalem ati saye, kalu nurutin perasaan emang empet banget tuh ame Kepale BAPPEDA, bahkan saye bingung juga ape Gubernur tau gak nih urusan. Rupanye, kayak bisa baca pikiran saye, temen saye ngomong lagi “Saye bingung, Sekda Provinsi ape tau? Gubernur ape cuma terime laporan sual pelaksanaan MUSRENBANG yang asal-asalan ini. Jawab dong bang” rada maksa ni temen,kerne dari tadi saye diem aje.

Akhirnye saye timpalin juga. Saye bilang ame ni temen “gak usah dipikirin. Ini udeh betaon-taon terjadi. Tuh aktivis dsan LSM nyang entu-entu mulu nyang ngatur. Nyang bisa diatur nyang diajak. Model ente mane diajak,hatta ente pinter dan ngerti. Bahkan denger-denger ade nyang dikasih tugas miliin siape-siape nyang diundang ikut MUSRENBANG. Macem caloa,gitu” . Saye atur diri supaye jangan emosi nimpalin omongan temen. “Menurut saye,emang kudu kite gebrak tuh BAPPEDA, kalu perlu SEKDA ame Gubernur. Khususnye kalu ngebahas soal program budaya, dimane budaya Betawi cuman dijadiin bingkai kegiatan walaupun kadang biayanye gede banget. Tapi ape bole buat, mereka nyang anggep ngewakilin pakar dan tokoh Jakarta ude ambil peran”. Ternyate sekarang giliran temen saye diem ngeliatin tampang ame mimik saye.

“Ude lama banget saye empet en dongkol ame orang-orang nyang ngesok ambil peran sual program budaye Betawi. Palingan juga nyari manpaat pribadi aje” kate saye. Sambil ngucek-ngucek mate, temen saya ngebales “tapi kan gak bisa didiemin terus. Kudunye lembaga atawa badan ape aje nyang ngelakonin seni budaye Betawi protes dong” . Saye ngakak gak kira-kira. “Pan gak tau kalo ade MUSRENBANG dan disitu dibahas juga program Budaye Betawi. Sekali lagi, pan tuh aktivis dan LSM udeh jago dan ngerasa ngewakilin orang-orang Betawi” kate saye.

Akhirnye kerne ujan deres banget, jadinye obrolan rada kurang asik. Saye ame temen terusin ngabisin kupi ame rokok nyang ade. Pas masup Ashar saye bilang ame temen saye, kalo nih urusan sebenernye bukan urusan kita,hatte kite empet ame dongkol. Jem setenge lime, setelah urusan laen nyang kite obrolin juga kelar, akhirnye bubaran. Saye balik pulang,sambil nyisain beberapa sual nyang ngebingungin disekitar kelakuan aktivis dan LSM tentang MUSRENBANG Provinsi.

Penyakit lama nongol lagi. Biasanye kalu beban rada berat,memori otak penuh dengan masalah nyang kudunye dikelarin, maka saye ogah naek kendaraan. Saye jalan kaki, dari Kebun Siri ampe Tenabang sambil dikit-dikit ngurai beban pikiran.

Bagi saye ini tantangan. Tapinye pan kudu ade nyang berwenang ikutan dalem MUSRENBANG Provinsi, khususnya kalo masup pembahasan sual program budye Betawi. Percuma aje dimuat dalem Undang-undang kalo gak bisa dijalanin. Tentu aje eni bukan sale Gubernur, kerne pasti die bakal terangin sual Peraturan pemerentah nyang belon ade selaen Perda-nye belon dibikin. Bujug…rebek juga nih urusan. Tapi saye juga kudu kritik ame tokoh dan aktivis Betawi gak mau ikutan disono buat ngebahas Budaye Betawi. Tuh aktivis dan LSM nyang bukan orang Betawi emang ude lame nguasain ni urusan. Tapi pan gak bole terus-terusan dibiarin. Sembarangan aje mereka ngajak orang ikut MUSRENBANG Provinsi.

Saye sebenernye kagak jelas, ape kriteria ame persyaratan supaye diajak urun rembug dalem MUSRENBANG Provinsi. Tapinye, kalu entu-entu mulu nyang terlibat,kayaknye kite gak setuju,apelagi gak juntrungan dasar keikutsertaan mereka. Gak tau deh pejabat Pemprov.DKI Jakarta nyang mane nyang ngatur die-die melulu terlibat dalem MUSRENBANG Provinsi.

Alhasil,kalu urusan laen sebenernye saye cuek aje.Tapinye kalu sual program Pemprov DKI Jakarta mengenai Budaye Betawi,saye ogah kompromi. Apelagi kate temen saye, ade mafia proyek budaye Betawi di Denes. Lantaran setaon terakhir saye giet-gietnye nelusurin masalah sejarah peradaban dan kebudayaan Betawi, termasuk keseniannya. Keliatannye Budaye Betawi cuman jadi pelengkap aje dalem program pemerentah.

Saye kepengen banget pengurus lembaga kebudayaan Betawi diikutsertakan dalam MUSRENBANG Provinsi dan tentu aje sangat bagus kalo ngelibetin juga pegiat budaye Betawi. Ude waktunye dipertanyakan tuh ame aktivis dan LSM nyang ngikut MUSRENBANG, ape die juga ngerasa wajib ikut ngebahas masalah program budaye Betawi ??? Kalo terus-terusan dibeginiin, ude bole kite nyatain, emang budaye Betawi cuman jadi bingkai program Pemprov DKI Jakarta dibidang kebudayaan dalam arti keseluruhan. Jadi anak tiri dalem keluarganye sendiri. Padahal banyak pegiat budaye dan pelaku kesenian Betawi kerne ngerasa penting dan bertanggung jawab, terus ngelakonin buat ngejagain supaye Budaye Betawi tetep ade. Sementare duit bejibun disono gak tau ape tepat sasaran dalam menyusun program budaye Betawi. Saye sih pesimis,gak mungkin sesuai dengan kehendak Undang-undang, juga semestinye nih Budaye diimplementasiin.

Akhirnye, kerne ude rada kendoran nih syaraf,saye pikir, sual Budaye Betawi mungkin gak begitu penting dipersoalkan dalem MUSRENBANG Provinsi. Bahkan dengan ngeliat kenyataan ini, kayaknye perlu dipertanyain : MUSRENBANG Provinsi buat ape ? Silahken aje Kepala BAPPEDA,Sekda Provinsi DKI jawab. Kite tunggu deh…. Tabe.

(Tenabang,ditulis 28 April 2011,jem 02.00, Mathar Moehammad Kamal, Pegiat Budaya Betawi, Ketua Forum Kajian Budaya Betawi)

Kategori:RUPA-RUPA
  1. Belum ada komentar.
  1. No trackbacks yet.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: